Magnesium
Magnesíum
Um 50-60% af magnesíum er að finna í beinum og hin 40-50% dreifast jafnt á vöðva og aðra vefi líkamans. Magnesíum tekur þátt í meira en 300 ensím efnahvörfum í líkamanum, þar á meðal uppbyggingu DNA og próteina. Við vinnslu á heilu korni, getur allt að 80% af því magnesíum sem er til staðar tapast. Kalk sem bætiefni getur haft neikvæð áhrif á frásog magnesíums.
Uppspretta: Brauð, pasta, hrísgrjón, grænmeti eins og spergilkál og spínat og baunir, en einnig finnst magnesíum í kjöti, fiski og mjólkurvörum. Vatn getur innihaldið magnesíum en það fer þó mikið eftir því hvaðan vatnið kemur. Þar sem magnesíum, líkt og önnur steinefni, tapast við matreiðslu, er ákjósanlegast að nota sem minnst vatn og sjóða matinn í sem stystan tíma.
Magnesíumskortur: Skortur á magnesíum er sjaldgæfur en getur leitt til vandamála tengdum vöðvum eins og vöðvakrampa (sinadráttar). Eldra fólki, sykursjúkum og áfengissjúklingum er hættara við magnesíumskorti en öðrum.
Aukaverkanir: Getur valdið linum hægðum. Engar aðrar aukaverkanir þekktar.
Einstaklingar með nýrnasjúkdóma eða hjartasjúkdóma ættu ekki að taka inn magnesíum nema að höfðu samráði við lækni.
Ráðlagðir dagskammtar:
Ungabörn 6-11 mán 80 mg
Börn 12-23 mán 85 mg
Börn 2-5 ára 120 mg
Börn 6-9 ára 200 mg
Karlar 10-13 ára 280 mg
Karlar >13 ára 350 mg
Konur >10 ára 280 mg
Konur á meðgöngu 280 mg
Konur með barn á brjósti 280 mg
Heimildir:
- Insel P, Turner RE, Ross D. (2007) Nutrition. London. ISBN-10: 0-7637-4252-X.
- Vítamín og steinefni fræðslubanki. Tekið af vef lýðheilsustöðvar. Slóðin er: http://www2.lydheilsustod.is/vitamin
